Rebħa kbira tar‐Rużarju seħħet fl‐Awstrija wara t‐Tieni Gwerra Dinjija. L‐Awstrija kienet maqsuma bejn erba’ pajjiżi alleati. Wieħed minn dawn il‐pajjiżi kien ir‐Russja, li imponiet brutalment il‐komuniżmu fuq l‐Ewropa tal‐Lvant. Ir‐Russi okkupaw l‐Awstrija t’Isfel, li kienet l‐aktar parti għanja tal‐pajjiż u kienet tinkludi l‐belt kapitali ta’ Vjenna. Hekk kif il‐qabda Komunista ssikkat madwar l‐Awstrija t’Isfel, il‐Madonna offriet soluzzjoni lil uliedha Awstrijaċi: ir‐Rużarju Mqaddes. Fl‐1946, Dun Petrus Pavlicek, qassis Kapuċċin, għamel pellegrinaġġ lejn is‐santwarju Marjan importanti ta’ Mariazell biex ifittex l‐għajnuna tal‐Verġni Mbierka għall‐Awstrija.

Hekk kif talab quddiem l‐istatwa mirakoluża tal‐Madonna fis‐santwarju, sema’ dawn il‐kelmiet ta’ faraġ mill‐fond ta’ ruħu: “Agħmel kif ngħidlek, u jkollok il‐paċi.” Dun Pavlicek fehem li l‐Madonna kienet qed titlob lill‐fidili biex jitolbu r‐Rużarju l‐istess kif kienet talbet lit‐tliet rgħajja f’Fatima, il‐Portugall fl‐1917. Billi sema’ t‐talba tal‐Madonna, huwa waqqaf il‐Kruċjata ta’ Reparazzjoni tar‐Rużarju Mqaddes fl‐Awstrija, fejn talab għall‐ħelsien tal‐pajjiż mit‐tirannija Sovjetika, il‐konverżjoni tal‐midinbin, u l‐paċi madwar id‐dinja.

Matul l‐għaxar snin ta’ wara, għadd kbir ta’ Awstrijaċi ħadu sehem f’din il‐kruċjata tat‐talb billi talbu r‐Rużarju u ngħaqdu ma’ purċissjonijiet Marjani. Fl‐1955, aktar minn nofs miljun ruħ, madwar għaxra fil‐mija tal‐popolazzjoni, ipparteċipaw f’din il‐kruċjata biex jibbumbardjaw is‐sema bit‐talb. Is‐sema wieġbet lil hinn minn kull aspettattiva. F’daqqa waħda, il‐gvern Sovjetiku ddikjara li kien qed jirtira t‐truppi tiegħu mill‐pajjiż. Sas‐26 ta’ Ottubru 1955, it‐truppi Russi kollha telqu. Mhijiex koinċidenza li r‐Russi telqu matul Ottubru, li huwa x‐xahar li l‐Knisja tiddedika lir‐Rużarju l‐Aktar Imqaddes.

(Sors: Joseph Gensens: https://www.tfp.org/the-rosary-has-saved-nations-in-the-past-can-it-save-america-now/ 4 ta’ Settembru 2020)